رغايف الفرن بالتونه و الفلفل و الزيتون

من طرف **najat** الجمعة ديسمبر 13, 2013 1:11 pm

رغايف الفرن بالتونه و الفلفل و الزيتون

هاد الرغيفات كنديرهم بزااف للعشاء مع اتاي أو الحريرة
كنعجنو عجينة الرغايف العاديه الدقيق + الملح + الماء+ راس معلقه صغيرة دالخميرة
و و كنعمروهم و نطويوهم و ندخلوهم للفرن يطيبو
و ممكن دهنو وجهم بالبيض باش يبانو محمرين بزااف
أنا عمرتهم بالتونه و الفلفه و الزيتون
و كل واحد كيبقى ليه الإختيار فالحشوة
نحطو البصله مشلظه + الفلفله خضرا و حمرا مقطعه على النار + شوية الزيت
و نخلليوهم يدبالو شويهنزيدو الزيتون مقطع طريفات صغار و العطريه (الملح/ سكنجبير/ التحميرة/ الفلفل الاسود/
شويه الكمون / و اللي كيبغي الحار يدر السودانيه او الهريسه
و ممكن تزيدو مركز الطماطم (انا هنا مدرتوش)
فالأخير كنزيدو التونه + الربيع مقطع و نخلليوهم على النار دقيقه تقريبا
و نخلليوهم على جنب يبردو
كنقطعو كرات من العجين بعدد زوجي لأن كل رغيفه غادي تطوى فزوج كرات
و ندهنوهم بالزيت و نخلليوهم شويه يطلقو
كنطلقو الكرة الاولى بالزيت و نحطو فيها مقدار من الحشوة
و نطويوها الطويه العاديه على شكل مربع
نطلقو الكرة الثانيه
نحطو فيها المربع الأول بالشكل اللي يكون
الوجه المطوي التحت
و نطويوها ثاني بشكل مربع
نزلوهم فطاوة مدهونه مزيان و منين نكملوهم
بضغطو عليهم باليد غير بشويه
و ندوزو على الوجه بسكين على شكل علامة ×

ممكن دهنو الوجه بالبيض
ندخلوهم يطيبو فالفرن حتى يتحمر الوجه و بالصحه و الراحه